Elwedritsche

Elbedritsche Zeit

Wann die Widdring bidder kalt is 
Un es Glaas schteht naegscht an zwee. 
Wann der Wind peift laut un reissend, 
Is es Zeit fer yaage geh. 
 
Kumm, mer suche Elbedritsche! 
Des Satt Wedder gleiche sie 
Un mer muss sie gaar net schiesse. 
Heb die Sack, ich yaag sie hie! 
 
Elbedritsche, die sin arig 
Abbedittlich fer en Fescht. 
Mit dem rau un schtarmich Wedder 
Sin sie yuscht recht uffgemescht! 
 
Hoscht sei Lewes Elbedritsche gschmackt 
Im Bottboi adder Wascht? 
Des gebt wunnerbaar gut Esse 
Ennicher Weg as du sie machscht. 
 
So kumm raus, mei guder Kummraad, 
Un mir gehne graadaweck 
Naus die Nacht fer Elbedritsche, 
Erscht find paar so gudi Seck. 
 
Un ich will dir graad eischarfe, 
As es nemmt en guder Mann 
Fer die scheie Dinger finne! 
Loss mich weise, ass ich kann! 
 
Ich geb dir die leichde Arwett, 
Brauchscht yuscht do schteh an der Eck 
Vun dem Schopp do uff uff dem Hiwwel, 
Un nau heb eens vun die Seck! 
 
Ya, des is en bissli kalt haus, 
Awwer des zehlt all es waert sei. 
Wann du moll dei Sack ganz voll hoscht 
Mit de Elbedritsche fei. 
 
Waard yuscht do un bhalt Geduld, 
Heb der Sack naegscht zu der Grund. 
Ich yaag glei der Sack ganz voll 
Mit Elbedritsche fett un gsund. 
 
Schteh yuscht do, schweiend un ruhich, 
Elbedritsche sin so schei. 
Heb der Sack un warr net grawwlich 
Un ich yaag sie dazu nei. 
 
Du verschtehscht woll, as mei Paert 
Nemmt en Mann mit viele Hann. 
Ich duh all die Arwett, weescht du, 
Weil ich bin en schmaerder Mann. 
 
Es naegscht Mol weis ich dir vielleicht 
Wu mer die Gediere findt, 
Fer des nemmt Geduld, sie finne. 
Mer muss schlau sei un aa gschwindt. 
 
Denk yo gaar net an des Wedder, 
Saagscht sis widder kalt, so was? 
Kumme Elbedritsche zu dir, 
Noht gebt’s Schpass! 
 
So gehn ich nau fer sie mol finne 
Un du bleibscht do an dem Eck. 
Un wann sie zu schpringe kumme, 
Geb acht, kenner kummt aweck! 

Gladys S. Martin (1937-2019), Ephrata (PA)